المطبخ السياسي- شعراء الثورة

قصيدة تميم البرغوثي الرائعة "يا شعب مصر।
نداء للإستمرار في الثورة تحرك مشاعر الإنسان المصري بإعتقاد راسخ عن الذات لم يهتز إلا في حكم مبارك البائد, فذهب الذل ومنح ربك العزة لمصر والمصريين।
يا شعب مصر .... يا شعب مصر اللى سابقة ضحكته غضبه
مايطلع الصبح الا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستئذنة وهى مش عادتها الاستئذان
متونسة بالميدان وبعشرته ونسبه
يا شعب يا مصلى قدام العساكر صف
يجرى الجريح من ورا لقدام لا خاف ولا خف
تدوس عليه العربية تحولة لمية الف ...
يا للعجب يقتلوه يتوقعوا هربه
يا للعجب يقتلوه يتوقعوا غيابه
اللى اتقتل لسه واقف هو واصحابه
ما بهدل الأمن غير من ماتوا واتصابوا
والصبح ما نور الا اما الشموس غربوا
اضرب عليا انا مش جارى يا قناص
من امتى خوفنا يا ابن الكلب ضرب رصاص
كل اللى شاف الشهيد بقى تاره تاره الخاص
الدم صاحى وعنيدولا تقبلوش تربه
يا شعب يااللى دفع تمن الشوارع دم
احفظ اسامى اللى ماتوا فى الشوارع صم
الشارع اللى اصطفى وقصر الأمارة لمًّ
ملوك قليلة الرباية ركبوا واتركبوا
شعب بغزالة اتخنق قلب التاريخ فى يومين
لابس عباية جحا وهو صلاح الدين
بيكرم الانبياء ويهزء السلاطين
والفجر خيله وحبات الرمال عربوا
يا شعب مصر اكان فرعون وفرعونة
ضربتهم ضرب سجاده فى بلكونة
ضرب الملوك تربية صالحة ومضمونة
ما يبقوا بنى ادمين الا اذا اضربوا
ضرب الملوك مصلحة ضرب الملوك تأديب
ما احلى المماليك وهى بتجرى فى السراديب
ولولا ضرب شجرة الدر بالقباقيب
ما بين اغا وباش اغا كانوا التتار غلبوا
بعدين مبارك سادات فاروق محدش دانه
هو احنا شعب كده مبيعشلناش حكام
عقبال جيرانا وحبايبنا كمان يا سلام
لو كل من كان له رئيس نصحى نلاقيه قلبه
يا مصر لسه ولسه الثورة بلت ريق
ما ينتهيلك طريق الا ويبدا طريق
يا شعب مصر تعالى نتفق يا شقيق
رج الملك قببل ما تنعم عليه بلقبه
رجه كده شوفه إن كان الملك شغال
وأسال عليه المكوجى وأسال عليه البقال
واهم حاجة فى صفاته إنه يكون يتشال
متربى عال لما يمشى يلتزم ادبه
بتكون فى احسن حالاتك وانت مش محكوم
بتبقى رايق ولا ظالم ولا مظلوم
بعدين دا ايه الغبى دا اللى يهديدك بالشوم
يا مخلى الف احتلال ينزل على ركبه
يا شعب انت اللى كارم كل من حكمك
الدولة دى عارفة تحكم بس من كرمكم
كشرلها وهى هتجيلك تبوس قدمك
مفيش حاجة اسمها مليون راجل اتخصبوا
سايق عليك النبى ما تقول كفاية يا شيخ
الملحمة لما تخلص يبدأ التاريخ
وبكرة جايه حروب فيها بكى وصريخ
وبكرة نصرك يخض الشمس من لهبه
سايق عليك النبى ما تقول كفاية كده
من النهاردة انتصاراتك هتبقى كده
يا شعب مصر اللى رجلته وبناته كده
حلال عليه لبن العصفورة لو طلبه
سايق عليك النبى متقول كده كفاية
افرح وكمل ومتقولش كده كفاية
الثورة دى بداية زى الهجرة والميلاد
الثورة دى بسملة
كمل بقى الأيه.....مع كل مرة قرايه
حسنها يزداد
والايه تجرى تسلم اختها الراية
من غير نهاية
وحتى الوقف مش معتاد
وبكرة ايامنا تبقى حكاية ورواية
عن ناس يباتوا حفايا يصبحوا اسياد
25 يناير يا شباب حصل ايه...؟؟
لو قولنا يعنى على الساعة 3 الفجر
كان حد فينا طول او جد حاجة عليه
او جاب سلاح او ملايكة بشروه بالنصر
كان يختلف فينا ايه عن اى يوم قبليه
نمنا غلابة صحينا أحنا ولاة الامر
كان عرش مصر فى اوضنا واحنا ناسينه
رامين هدومنا على شماله وعلى يمينه
طردنا عنه الحرامى غصب عن عينه
ونزلنا عالميادين بايدينا جارينه
وبقوا الملوك فى الشوارع
والعبيد فى القصر
وفى يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه ...؟
وشعب مين اللى كان الظبط حاكمينه
بدولة شومه ومختومة بختم النسر
وكل واحد قرأ اللى كان على جبينه
رفع بدمة يمنه هدية وهداية
لو كانت الانبياء عالميه مشايه
لاجلك يا مصر مشينا باسمين على الجمر
يا مصر وافتكرى اصلى الدنيا ناسيه
الملك دا حقنا ومفيش فراعنا جداد
افرح ...وكمل ومتقولش كده كفاية
الثورة دى بداية زى الهجرة والميلاد
مش بس مصر اتغيرت من وقفة الميدان
فى حته ضلمة نورت فى طبيعة الإنسان
مش بس مصر اتغيرت من وقفة الميدان
فى مساحة ضلمة نورت فى طبيعة الإنسان
فى حاجة فى طبيعة البشر
زى السمع .... زى البصر
زى إكتشاف القدرة على الطيران
فى حاجة كانت ضايعة وبانت
خلت الامة استعانت
على الشقى بالله فهانت
هذه الدنيا على الفتيان
ارقينا وارقيهم ياعم الشيخ
فى حاجة خلت يشمك التاريخ
ينزل عن الوجه الجميل فيبان
والخلق كانوا مدريكين
لكنهم مش كلهم متاكدين
لحظة ما شافوا بعضهم جوا المظاهرة
اصبحت واضحة وظاهرة
نعمة الرحمان على المستضعفين
وصلت رسالة ربهم
من كل زهرة ... كل زفرة.... كل نفرة
كل زحمة فى كل حارة
أو خناقة فى الأشارة
كل كلمة حق
او ضحكة ولد أوبنت
كانت دعوة مستورة إلى العصيان
فى حاجة أصلا فى الطبيعة تدعو للثورة على السلطان
شوف الشجر رغم الحجر طارح ثمر زى الخبر وبتعلنه الأغصان
شوف الهوى حب اللوى فبقوا سوى هب لها الألوان
شوف القمر يفضل قمر تحت الحصار
رغم اقتناعه انه هيموت قبل مايشوف النهار
تحصل مفأجاة تطلع الشمس فى حضوره
يختلط نورها بنوره
تشبهه متقولش واحدة من ولاده
هى معناه وامتداده واخده منه الموهبة والبغدده
وعلشان كده لغة يقولوا عنهم القمران
شوف النجوم مالهاش نظام حاكم
تكسر كلمة العالم يبص ويبقى مش فاهم
وهو شايفها ماشية بكيفها فى الاكوان

يا سما هويتك انتى بيتى وقلبى بيتك
تشبيهينى واشبهك بالمعنيين
الشُبه يعنى والشبه يا ام النجوم الفلتنين
واموت انا فى فلتانك الامنى
لانه عبقرى وفنى
وفى منطق من الموجود فى كل جنان
وبردوا بحبه بس كده علشان فلاتان
فى حاجة غامضة بتُكتشف
هى اللى بتخلى الحصان اللى اتحدف
من بطن امه لسه مش عارف يقف
يئزحق ويجرى ويعرف انه حصان
فى حاجة بتخلى السجين المستكين
فى كل حين اشطر من السجان
فى حاجة بتخلى القوى عيل اوى
وبيتلوى من نكته الغلبان
فى حاجة بتخلى عيون الخلق متنامش
وبتخلى المدن تمشى
وتخرج زى كلمة حق من غير قصد
مبترجعش لو طلعت
ومن الاسمنت والاسفلت يفلت فلت
نهر مقدس الجريان
فليحذر السلطان زحف الغابة
والورد اذ يستئنس الدبابة
داب الحديد من لمسته دوبان
فى حاجة خلت خطة الموت ترتبك
عابس وعايز يشتبك
خاف من ضحية جاية ناوية تأخده بالاحضان
وإذا بهذا الفجر يا اخوانا اتولد بينا
وكنا احنا بنستنى وهو كمان بيستنى
واتاريه بس عايز أذن منا
وهو فى منا فلما اذنا خد منا وعطانا امان
يا فجر يا سابق صياح الديك
يا شعب يا مشبك ايديك فى ايديك
وكأنها خط الثلث فى ايه القرآن
اديت لآدم معنى تانى
زاد على كل المعانى
وربنا قال هو دا غرضى
ودا قصدى كده بالظبط
لا زيادة ولا نقصان
يا مصر وانتى لسه فى البدايات
بكرة اللى جاى اعظم من اللى فات
يا مصر قومى وبصى فى المرايات
كان كل واحد فى الميدان جايب معاه مرايا
رافعها للسما اشكال وألوان
كلها مرفوعة فى العالى
صبحت مرايا واحدة بتلالى
وبقت يا مصر الأرض صورة للسما
لعبة بازل متكاثرة الاجزاء
لما البشر يتجمعوا تبان السماء عالأرض
واما البشر يتفرقوا تلقى السما بتنفض
تبقى سماء متوزعة جوا الشقق
وتمر ليلة من التوجس والقلق
وننام ونصحى تانى يوم
ترجع سما لمَّا البشر يتجمعوا مع بعض
يا مصر حقك تملكى بدل السما اتنين
واحدة هدية وواحدة تانية صنعها مصريين
يا مصر لو دققتى هتلاقى البراق
بيجر عربية فواكه فى الحوارى الضيقة
شوفى الصحابة والحواريين على القهوة بيتناقشوا بحرارة
والسما على مد ايدهم مستشارة طيعة ورقيَقة
شوفى المساجد كانت بتشاور على السما
صبحت تشاور عالبشر وتقول اهم يا سما
بصى و شوفى
وابقى قولى لكل صوفى
وهو طالعلك طريق المعرفة اتغير
يوصل من السما للأرض لا يتوه ولا يحير
وشوفى الخلق وسط الموت تقابله وهى بتهزر
فيتلغبط ويتبعتر
وسر الدنيا يتفسر ونعدلها ونوزنها
بقول يا مصر قومى و بصى فى المرايات
فى سما الولاد هم اللى عاملنها
بيشوفوا بعض فى وش بعض
كأن انا انت وهو انا واحنا الكل
احنا فى مرايا بعض بنصبح صباح الفل
افدى بروحى كل واحد فى المرايا طل
افدى الشهيد اللى بيتبسم
الفجر توب على اده متكسم
والله اعلم مين من الاتنين فى صاحبه حل
افدى اللى سهران على الخيم فى الطل
وافدى اللى واقف يشتغل فى الضل
وافدى اللى شايل للعناد اشارات
يهدى التاريخ ثوب الميدان لو ضل
وافدى اللى واقف هارى نفسه كلام
وافدى اللى يتريق على الحكام
وافدى اللى رايح جاى مبيتعبش
وافدى اللى جنبه حط فرشه ونام
وافدى طويل البال ميتعصبش
وافدى المصاب اللى شوية وطاب
وافدى المصاب بهوى التراب ومطابش
وافدى اللى صاب البلطجى ومتصابش
وافدى المقام العالى فى التحرير
دولة بلا امراء وشعب امير
أعلم ياهذا الجيل ان الوطن بشروا
لو مصر مالهاش نيل كان شعبها حفروا
مش وصلوا بحرين
وبنوا جبال اتنين
وفى ظرف اسبوعين على خوفهم انتصروا
والخوف دا شيئ معروف
بيفرعن الحلوف
رزق الملوك الخوف من غيره يندثروا
رزق الملوك بقشيش
من خوفنا شعب وجيش
ومفيش ملك بيعيش لو شعبك افتكره
ناس لسه فى العشرين
نازلين على الميادين
بيهزؤاء السلاطين
من غير ما يعتذروا
يا شعب يا مجنون
علم شعوب الكون
اللى اخترع فرعون
قادر يجيب خبره
يا سادة الأيام
يا رافعين الهام
من بكرة بر الشام
نادرلكم شجره
نادرها تين وزيتون
فى القدس ينتظرون
جيش على الغلابة
حنون ولعى العدى ضرره
دافعين تمنها دمى
يا امة الكُرمه
شعبك كانه سما
والدنيا دى مطره
يا مصر حمدالله على السلامة
مطر ونازل بدون غمامه
مطر يا سيدى نازل وطالع
كأنه مدنى والأرض جامع
والأرض دى مظاهرة فى الشوارع
تسقى السما جدعنة وشهامة
مطر وطالع يقول لربه
الامهات اللى فى مصر ربوا
ويابنات مصر قوموا حببوا
اجمل ما فى الراجل الكرامة
مطر وطالع على الفجر يدن
طلعت بنات مصر حلوة جدا
فى الحرب والدنيا نار ومعدن
طايرة وشايلة السما اليمامة
25 من شهر واحد 2010 وزادوا واحد
كنا ملايين وكنا واحد
حددنا موعد يوم القيامة
قلت لصحابى انزلوا
وانا بعيد عنهم
قلت لأصحابى انزلوا وانا بعيد عنهم
وقلت مين بات فى بيته سلم أصحابه
وانا اللى غبت وهم اللى هنا اتصابوا
نزلوا الشباب الميدان
وانا بعيد عنهم
كسروا الشباب البِبان
وانا بعيد عنهم
خرج الشباب من البيوت
وانا بعيد عنهم
دخل الشباب فى الموت
وانا بعيد عنهم
يا موتى قوم امتحنى
اعتذر منهم
اشمعنى يا كلب تثتسنينى من بينهم
يوم الخطر قبلها ما كنت اجبنهم
يا موت تعالى اعوض غريتى ومنفاى
يا موت تعالى احاسبك على القديم والجاى
يا موت تعالى ونتقاسمك انا وعداى
ولا تطال عزوتى
وانا بعيد عنهم
بس الحكومة قالتلى انت مش مصرى
انت فلسطينى يعنى اجنبى حصرى
طيب يا بيه يعنى بر الشام بلاد اروام
اعيد كلام قلته ميت مره ده يبقى كلام
مش ام هاشم بلدها السيده زينب
مش الحسين في الحسين والا لازمله جواز
ولا هيختار بين مصر وعراق وحجاز
والمرسي والشاطبي جم من الاندلس الاتنين
من مرسيه وشاطبه لو كانو مش باينين
في اسكندريه اجانب والا مصريين
اسماءنا هيا بلادنا يا حسن يا حسين
اسماءنا زي العلم زي اللغه والدين
اسماءنا هي الوطن له دمنا لو عاز
واسمي خلالي في الارض العريضه ملاذ
وعزوه في كل دار تنطق حروفه تمام
وفي كل دار ليه صحبه وليا اهل عُزاز
كان نفسي يا مصر يتأكد كلامي بدم
والدم يا مصر بردو على المحبه قليل
قالولي بتحب مصر قلت مش عارف
هو الهوى يبقى جارف لما اقول جارف
واقعد الَّف اغاني عن جمال النيل
وحكايه الشرب ميه مره وهرم ونخيل
ولا الهوى الحق هو اللي يهد الحيل
واولى شيء في الهوى يا مصر هو شيل الهم
ياللي تحب النبي سمي عليها وشيل
الحب اتقل من اسمه واسمه نفسه تقيل
وفي التباس المحبه على المحبه دليل
ما تعرف اللي اصابك عشق والا تعب
والشوق بقلب مع الحرمان ساعات بغضب
والصبر بس اما يخلص يبقى صبر جميل
يا اهل مصر وانا اهلي في مصر عرب
اهلي عزازمه وعاشايره الخال وخال الخال
ما بين شراقوه وصعايده بدو في الحالتين
قولولى دولا عرب او دولا مصريين
او دولا الاتنين سوا في الحل والترحال
بعدين انا اسمي تميم وهاروح من اسمي فين
مش في فمصر قريش
قالو البراغته قريش
من بيت عدي بن مره
والنسب عمري
حطو الحدود والعشيره واحده في البلدين
وسلك شائك فرق من قالو ليه او ليش
وكنت اطنش لو ان البحث ده نظري
لكن ده في دم سال واسأل رفح وعريش
واسال ملوك ترهن الأقصى برغيف العيش
واسال حدود تحرم المسلم من الحرمين
واسأل في غزه الوف في الحرب متحاصرين
ويخيروني العيال في حب اب وام
انا ابن رضوى ومريد اسمي تميم من تم
وكل دار للعرب لي فيها خال او عم
واللي يقول غير كده بيني وبينه الدم
مين اللي يثبت ومين يجري يلم الديل
شد الكلام عمته واختار اعز جواد
ورد قاصد بلاده والهوى رداد
وابن الاصول اللي ما يبدل بلاد ببلاد
والغربه مره ولو كانت هدومها جداد
في مصر بعد السفر وجد الكلام معناه
واهل مصر صحابي واولياء الله
يا اوليا لسه في العشرين وفىالتلاتين
يستنجدو المؤمنين في المازمه بيكم
يا فارجين الكرب بين العرب عناويين
منعني عنهم مطار القاهره واسمي
واني لو جيت يقولوا اجنبي
مسكنا واحد اهو ليه مديه في حزب الله
يتهمو اصحابي بيا مش انا بيهم
واضرلي سته سبعه اكون في وسطيهم
ع بال ما خلص الكلام ده النصر كان مضمون
القلب فرحان لكن اتعبه منفاه
وهده بعده عن اللي عاش بيستناه
ما فضلش غير اني انحني حبا واني اقول الله
الله افردني عنهم
وجمعهم لكي اراهم على بعدٍ واسمعهم
قد فاز فوزا عظيما من قضى معهم
لما تشوف الشهيد تبقى السلامه خجل
وتبقى عايز تقله يا اخي أسف
طاب قلي بس اعمل ايه لو يعني فيها عمل
اللقمه دي ليك نصيب فيها باشيلهولك
واشيل نصيبك من القاعده وكاسات الشاي
لكن نصيبك في انفاسي اشيله ازاي
وازاي اشيلك نصيبك من فرحنا اللي جاي ..؟؟
ساعات بلاقيني باطلب خط محمولك
باعمل في نفسي كده ليه لسه مش عارف
واروح على القهوه اسأل هو جه وسأل
مين قالك الموت طبيعي يبقى مش شايف
الموت ده شيء مش طبيعي
الموت ده اصله خلل
الأصل فينا لاخلود وهايجي يوم نلقاه
ما تحسبوش الشهيد اداكم بس حياه
ما موتوش هو وحده اللي برصاصه رماه
ده طخ ابنه اللي لسه ما اتولدش معاه
وطخ اولاد ولاده لحد اخر الايام
موت معاه بشريه كامله محتمله
عدو بقى فيها كام شاعر وكام رسام
وكام طبيب عبقري بين الاطبه امام
و فيلسوف له على حكم الليالي كلام
وبنت نظرتها تشفي القلب من دائه
في شعب كامل رحل ماعرفش اسمائه
في جسم كل شهيد في مصر مكتمله
فخلو مصر اللي فاضله تعيش كما شاءوا